豁出去獨木舟漫遊 (一) 再戰東龍島
相關遊記: 豁出去獨木舟漫遊
3年前四級風挑戰東龍島，巧遇真理之門而飲恨，3年後既今日，趁8月未起風時再挑一次。放足四日假，今次最遠又可以去到邊?
7月尾，dino來電，話要清假想獨木，不過公司超忙，只能一夾8月尾4日之旅， 好耐冇出咁耐trip，一定要plan一個不後悔的路線。
全綑大嶼、hea遊印洲塘、南面跳島之旅，前前後後超過十個plan，最後由時任主席雷老闆一槌定音，時間緊迫，已經book唔切車，只好駛出袋起左幾年既東龍Plan，當年真理之門一役係時候要覆焯喇。
忙完8月電腦節，就只有兩日既放工時間可以為個trip準備，連衫都爭d洗唔切，真係灰灰地，好在pack野黎講真係訓練有素，出發前一晚終於pack好，仲有幾個鐘瞓下，無得輸，臨瞓前再睇天氣，正wr，有幾陣狂風雷暴。
▲7點就要起身，仲早過返工，好悲。計錯車程攪到10點先到，遲左半個鐘，只好老點dino先到百佳買野食。
食埋個靚早餐就打的入斬竹，正式開始兩條吹水佬狂吹之旅，dino哥唔只體力好，瞓力強，連吹水力都遠勝於我。
一到斬竹centre就去倉庫攞雷老闆幫我準備好既槳同救生衣，一開門，當然又冇la，打比雷老闆， “太多野攪，唔記得左呀…你自己擒入去啦” 就係咁，dino既攀爬技又大派用場，仲要係爬有鐵刺既網，未落水先扣爆HP!!!
響dino深入險地既時候，我響外圍全力策劃!!!
▲攞好哂野，pack入艇就好快手喇， 12:14pm 落水，漠視所有航道既規則，直指東龍。
▲今日真係泳池水咁款，開心到不得了;話咁快就過左龍蝦灣，上次誇張到不行既滾水浪完全消失左，換來係平到可以玩水球既靜水海面。
▲雖然係好平靜，不過我地同普通人一樣都係會攰既，咁就響一個貌似東北既小海灣大休起來。
▲上網成癮，一大休就上網，見到九龍落暴雨，嘩好難唔驚，話哂如果吹起西北風上黎，最近既陸地就係菲律賓，而我最憎菲律賓。
▲由於天賦異稟既dino完全冇諗過要lunch，結果我地只有一包本來做零食既荔枝味椰果做lunch， 甜到MAX，完全補充左流失既HP，仲有找tim。
▲拖艇出左淺灘又行進。
▲三爬兩撥就望到清水灣，入面就係布袋澳，順風順水唔講得笑，可惜都成4點幾，如果仲有時間，其實仲有d力可以去遠d，不過今日都係止於東龍好d，hea下先。
▲到左清水灣鄉村俱樂部，已經望住東龍黎撐，百份百可以登陸，不過可能來得太易，反面心情唔太激動，好奇怪。先到鐵心石，又以最短距離轟入去
▲過左海，真真正正踏足東龍，好實在，講足3年既覆焯終於大成!
▲響小碼頭隔離個沙灘仔登陸，貪佢夠近士多同營地，不過後來聽返，原來公眾碼頭果邊有得宿營wr….
▲pack好野，就去營地喇，同前年來時一樣，都係去非官方營地，畢竟我地係為獨木而來，support 好緊要，近士多實在好大好處。
▲假日同南圍兩間士多都開，weekday既東龍我地兩個完全成為左貴賓，打聲招呼之後就直上營地， unload哂所有gear出來真係好好feel，防水袋雖然已經有若干入水，不過都冇出事，唔錯唔錯。
▲攪掂哂，就去食野喇，今次主要幫襯南圍士多，老闆阿黃健談熱情，而且佢地方乾淨清潔，好舒服。
先嗌一個麵加可樂，等食期間仲可以沖個靚涼，仲要有位比我地掛衫，去Wildcamp去到咁，都算好方便了。
▲響營地冇咩做，都係吹下水，吹吹下都天黑。到左9點幾，就去假日士多坐下，飲下野，攞水同埋貪佢夠光睇地圖，老細趁機抒發對香港既不滿，咁我地就吹下水la又。
講講下，老闆叮囑我地，如果去蒲台，吹北風就ok，如果吹東南風就千祈唔好，上網check一check，北風，正~ 不過風係會轉既….
吹多陣就返去了，結果，主要任務 – 攞水，由於冇人記得帶水袋而mission failed。
▲由於細風，即係夜晚熱到不行，除哂d衫都唔掂，就用埋濕毛巾敷身呢招，又OK wr，不過每次一瞓著，就比Dino哥d鼻鼾聲整醒，最後終於瞓著，條友仔居然哄埋黎響我耳邊扯鼾… 我梗係禮貌地醒佢la，懷住燥底咁再瞓。
約4點，個天不斷狂閃，報仇既機會到喇，因為我地冇起外fly，即刻拍醒dino一齊攪~ 之後就一覺瞓到天光哂都未醒…
2011年8月25日
