fbpx
水上活動獨木舟西貢及清水灣長途旅程

豁出去獨木舟漫遊​ (三) 東龍島‧壅缸灣‧白腊

相關遊記: 豁出去獨木舟漫遊

亡命連划3小時由東龍直衝壅缸灣,會合後發小隊。是日風浪稍大,不過,回到熟悉既西貢內海,已經好似打左針一樣,high左好多,決定臨時加綑伙頭墳洲。

經過第一朝自然醒要縮短路程既教訓,今日七半鬧鐘響二人真係起到身,呢晚算幾涼爽,瞓得好好,加上尋日短途冇衝擊,身體狀態Totally Recover! 自我感覺良好~

執好野Full Gear 又係南園早餐,食個麵隊罐可樂就要同阿黃道別,今日一別,唔知幾時再見喇。

遙望遠方既海洋,dino兄對去唔到患難島而斯人獨憔悴。
今日又起白軍浪。

今日既路線,已經冇再同大船對對碰了~

如果我冇睇錯Google map,小碼頭呢個應該係全東龍唯一既沙灘。

九點三落水,風同尋日差唔多,本身想先去果洲群島,不過望住果洲,二人心想,點解好似好遠咁既?

直線距離係6公里,見中間又航道又大浪,由於放棄已經成為習慣,二人相望一笑,手心又寫上skip一字,就宣佈果洲收皮,心裡只牽掛著今日由斬竹出發既同伴!

約左隊員們壅缸見,喺海中心不停以電話溝通,為嘅只係希望你到先唔好係我等你!!

今日照舊吹東南風,所以各北行走時一直都有橫浪相伴,happy,不過2級風都冇咩要小心,係冇行得咁自在,沿途已經放棄左做艇排既意欲,係咁撐,不過玩左兩個鐘,我突然肚餓起來,我同dino哥講我肚餓,dino哥答:唔係呀嘛?

唔理喇,都係搵返路先,行行下,喺外海真係有d迷失,雖然一直都望到陸地,不過響西貢群島要搵得arm都唔係咁易。

一直爬呀爬,去到大癩痢附近,見到真‧沙塘口山同火石洲,目測距離應該係10k之內,就係咁兩條友向心目中既一座沙塘口山進發(壅缸灣位於沙塘口山既北面)。

到大癩痢,離壅缸灣只有6k之遙,唯有餓住咁衝去同team b敢人會合,掂到沙塘口山,仲要由南去到北,真係有d爆爆地,就撐唔郁了。

越來越近目的地,已經開始用意志力去支撐。

埋到沙塘口山,已見海蝕洞。

Team B來電,已經到左壅缸,我同佢地講,轉埋彎就到,呢個彎,轉左半個鐘有多。

入到灣,先見到嘅係十幾首遊艇,跟手就見兩首古浪聚既舟,終於敢人會合喇~

壅缸好多珊瑚,響水面都拍到。

太多人船P,仲打哂沙灘排球咁,冇計,集合後大家一齊去左左側既小石灘避一避,潛一潛,點知一落水就比石珊瑚插爆腳,可能水又退,d珊瑚又好近岸,完全冇得潛。終於搵到路私家路浮出去,浮到好出都係咁,勉強下潛,d水濁到不行,比遊艇揚起哂d沙,冇得潛,小芯仲意圖繼續潛,結果都係失敗又回。

死死地氣只好上岸喪食乾糧,仲有梨食tim,營養好大機會均衡過屋企餐飯。

同時發現防水袋入水,回家搶救無效,E71死於非命 (2009-2011)。

大休過後,HP又回復到MAX,提議今日加路一遊伙頭墳洲及橫洲中間既水道~ 我地貼伙頭墳洲而行,一直望住橫洲,原來橫洲好玩d wr,又有位上岸,又多海蝕洞,決定明天再玩。

途經三洲門。