台灣三十 – 第一部: 高雄行走

先黎簡介一下成個30日台灣之旅既大綱 – 先響高雄同JOE，BANNY遊蕩兩日，再落墾丁JOIN埋龍比利浮潛加機車遊，之後去綠島學潛水，再向合歡山出發，順遊清境及日月潭，最後就15日單車環島生涯了~

三人成團遊高雄，台灣之旅正式開始!

DAY 1

出發前響香港留倩影一野，暫別三十日，咁大個人未試過出門咁耐，機會難逢，睇黎係可一不可再~為左30日唔駛剪頭髮，特意剪返個小生頭。

由於各人出發時間個個都唔同，出發果日雖然有幸同巴打們響機場食個LUNCH，不過我就早一個鐘上機，響機上睇下遊行書瞓一瞓，一程機話咁快就到，響高雄機場攪掂SIM卡上網之類既野就坐住等老友，點知佢地班港龍DELAY兩個鐘，真係硬等~

坐到崩之前終於等到佢地，即刻就坐捷運一個站去火車站，響AGODA BOOK左成個TRIP不停出現既舜鈺商務飯店，貪佢近捷運又平LA。一出站已經好多的士大佬，追住問係咪去墾丁，即管問一問價，都要三百幾港幣，貴過巴士少少，即管睇下點。

因為我之後要去台東，又去火車站問定班次先，問問下，回頭驚見BANNY GOR已經向台灣少女埋手問路，第一次見識佢既吹水技，獲益良多。NICE既台灣人唔理自己有約居然帶路前往，仲比埋WAHTSAPP 話之後有咩可以問下佢，BANNY GOR成功在望。我地就送上衷心既祝福。

其實只係5分鐘路，就到左舜鈺，當然少女已經脫離，我地就上房UNLOAD 野，之後就開始出遊了。起步已經5點幾，近近地行去六合夜市D檔都開門，見咩就食咩啦，由卡之前幾個月食得好清，夜市D野食相對真係好重口味，其實唔係好食得落，巴打們就食得好HAPPY，十分羨慕。台灣D野飲真係一絕，有檔排長龍既木瓜奶超好味，之後再到高雄時都ENCORE一兩野，有日睇電視都有介紹，睇黎有隊就排都係錯不了。

行完愛河就去再行另一個夜市，未入手SIM卡既既打一邊行一邊睇下有冇SIM 卡賣，問左幾間都唔太吸引，佢地結果都唔買了。黎到呢個時候，其實我地已經蕩失路，不過今日冇咩攪就由佢，一齊亂行，結果去左個比車去既夜市，好難行，求其一行買D野食就的士回酒店。返到酒店就再開餐，可能真係太油，食食下嘔左出黎，好在仲有大把日子比腸胃適應，今日就收皮好了。

Day 2

可能今日先叫正式旅行，響去墾丁HAPPY之前熱一熱身，踩下單車。呢個好似都係高雄既指定動作。瞓醒就先落對面個自助式牛肉麵，不過冇人食牛肉麵，雖然食完大家都覺得麻麻地，不過之後好似ENCORE左一次。捷運去起子灣站，每人幾十蚊港幣租左架爛車，以為閒遊冇咩所謂LA，點知成個可以甩出黎~ 當然係踩踩下先知LA。第一次響台灣踩車，已經感受到馬路有幾闊落，踩到去起子灣碼頭影下相，兜幾兜，就上船去旗津，因為係出名可以人車同乘，所以點都要一試啦。其實唔係好知踩左去邊，總之好明顯就去到軍營~~

呢個時候既BANNY就努力擺PO，增加後記既吸引力。

可惜踩多一陣都係鬆返，不過都冇辦法了，踩左粒鐘，以為可以環島一圈，去到盡，原來係唔WORK既，只怪太懶搵資料，連旅遊圖都不理，問一問海防人員，要掉頭先掂~有一日，如果我搵得返踩車途中既相，一定會好好咁圖片補完一下。

回到旗津市區，就係食海鮮既時候喇，都幾平，而且一份份咁寫好幾錢，免煮工，明碼實價。隊埋台灣啤，大滿足!

回酒店，抖一抖就又出去行街了，今晚目的係去買單車環台指南，雖然已經有本國產旅遊書，不過資料之少少得驚人，好快就掉左，諗住呢D書好易買求其去左兩間細鋪，點知都係冇，咁又變左夜市MODE 喇。呢個夜市同六合比又唔同，呢個似個商場，仲有得玩TIM，又食左唔少野。

—————————————————–

相關遊記:「台灣三十」系列