獨木環西貢半島 1. 斬竹灣至西灣
玩左獨木舟五六年，深深陶醉於佢極高既靈活性。每年復活節都會整個long trip，一來假期夠長，二來開始回暖，玩都玩得開心d。
記得幾年前，同dino+kit拍檔穿破邊，入浪茄都已經係當時最遠距離，之後冇耐又同dino膽粗粗想去東龍島，點知巧遇真理之門，大風大浪頂唔順唯有速逃，爆悲地原路回程，從此身體既一部份被拿走 – 就係個膽，幾年後嘅呢日先一試由西貢衝上大埔!
本身諗住出發前操體能結果當然無咁做，就咁以極頹既身體狀態去挑機，好在出發前兩日睇天文台，出發果幾日都係2-3級風，應該唔駛再見返真理之門。前幾日已經打比雷老闆，同佢夾我出艇call貨車d野，點知佢反建議我可以斬竹centre出發，大尾篤佢d老友既centre泊艇走人以，咁又煩少一樣了，very good。
Day 1 斬竹灣 > 西灣
六點九起身，第一日係旅程最艱苦，最挑戰既一日，由斬竹去到西灣，已經係我由斬竹出發去得最遠既一次喇。
八半西貢早餐，茶記快速了結早餐A，大伙再去百佳買埋終極補給，未夠九點已經上的士，去到古浪聚雷sir已經ready，攞好艇之後無啦啦同我地briefing左一野，都唔錯，好有參考價值。大概係聽到我個環西貢半島之旅之後，心知我有幾多貨仔既佢十分擔心，千叮萬囑我地去到浪茄，有咩唔掂就要回頭，亦大概因為佢對我地回頭方案太有信心，到最後都冇為我地響大尾篤上岸做出任何準備。
Pack足三日既物資都唔駛二十分鐘，一落水就一直向東，心底暗暗期望唔駛回頭是岸。天空灰茫一片，偶然仲有多少雨水，先前預測既二至三級略增為三至四級，馬頭環大休半小時補充體力後，我地就輕鬆地過鎖匙門。
未到馬頭環，真係DC都廢事開，過鎖匙門，亦係旅程既真正開始！完全唔考慮進入白腊，直指破邊洲去也,眼前為白腊邊既木棉洞。唔知夠唔夠水漲穿洞，唔理咁繼續Pass through佢
浪茄之前，我地亦巡例過一過破邊州，不過今日潮漲到暈，水道極闊，同上次過破邊可謂爭天共地了。再響水上觀看東壩既宏偉，就後浪茄出發了。
時間尚早，亦為左聽日可以去得更遠，決定不理雷sir浪茄過夜既建議，照原定計劃直闖西灣。
一出罾棚角，已經係另一個世界，海面突然變得洶湧澎湃，起伏落差極大，經歷過極悲壯既龍蝦灣真理之門既洗禮，暫時仲頂得住，不過每一度浪都要集中精神應付。
接下來就係今日重頭戲既大浪灣段，過左企角頭轉向北行，完全無遮擋之餘更要面對亂流同無情既橫浪密集攻擊，撞向岩岸響水底同水面造成既湧同浪將艇隻打擊得不停改變方向，咁大風大浪既情況真係yao-ming。
風浪下行走左三公里，見完一個山咀又一個山咁，連續三四次都係咁，因為大浪關係。離遠已經見到大洲同尖洲，離西灣應已不遠，Billy徐徐唱出夢想中的彼岸為何還未到，而我只有一跟唱出忘情才遊到彼岸。
終於望到遠方出現一片陸州，東灣，即刻可以轉入西灣喇!興奮到重新上力咁，轉入內灣後風浪亦已經緩和為內海狀態。
稍事休息就set場起營，之後就HEA，起埋營沖埋涼都係四點幾，Free到暈。
我地響呢間士多沖個靚涼，夜晚再黎食個飯($35/炒飯)，晚飯時打比雷sir報平安，佢話第二日會起風，不過試下先，過長短咀就係我呢個trip最難既一後，如果覺得頂唔順就一定要返轉頭，之後都係唔肯講大尾篤上岸既安排。聽完灰左，明明天文台話聽日二級風，而家話起風，我響西灣真係兩頭唔到岸，唯有不停刨地圖希望可以睇出一點希望之光。睇左一陣就發現睇黎都冇用，決定瞓覺。
