12小時大東生活圈

14 11 月, 201514 8 月, 2020 威章

路線: 伯公坳>大東山>二東山>黃龍郊遊徑>東涌

11月Facebook被大東山洗版,決定相隔十年再上去影下相,不過最近大東一帶真係多人到驚,唯有趁星期五收工夜入早出,期望避開人潮,靜靜地影下相。

收工居然樓下有MOCHA派,上山飲咖啡都好喎,咁就兩支入手。去到東涌已經9點,照舊M記晚餐加TASTE求其買兩餐就去搭車,原來去大嶼山巴士站條路Block左,跟指示行就OK,巴士站都搬埋,響360隔離。衝上3M就開車,掃視車上乖客嘅裝束,比想像中少行山人士,響伯公坳落車得自己一個,注定獨行玩法。

有街燈嘅馬路邊做最後準備,拉埋筋起步已經10點,難得落足一日嘅毛毛雨終於肯停,都係唔好拖,務求再落雨前可以上到山。

山腳位置仲有啲大樹同高草,夜媽媽又濕又黑真係有啲壓力,好在上上下因為太辛苦已經唔得閒分心感受壓力,Full Gear上山呢件事已經有好多年冇試過,今日一試,有另一番風味。

GPS顯示已經到左700米左右,回望石壁塘福一帶叫有啲景睇下。路況亦由大大舊石級變為泥路,斜度亦略為放緩。最後階段終於落出雨來,雖然行到熱熱地但都係出雨褸比較好,廢事攪到自己未起營已經失溫。

雨愈來愈大,連帶霧氣都好強勁,頭燈只係照到一片白茫茫,又冇帶穿霧燈,只可以手拎頭燈打低燈,叫做睇到下野,到800米有一段比雨淋到爛嘅路,呢一刻我只係想求其搵個位起個營,不過又幾大風,都係搵間營舍擋風好啲,不過響野都睇唔到嘅情況下唔知點搵,就響呢個Moment,心生一計,就係熄燈,居然有間屋仔響我十步之內,就係傳說中嘅18號屋仔。成個山頂暫時唔見有其他人,想搵個人打下招呼都冇。

咩都唔諗極速起營,拿拿臨入營先休息一下,HEA左成半個鐘先Unload 啲Gear出黎,檢查一下水袋原來飲左唔夠200ml,到聽朝都夠哂用。雨就一直落,睇黎都唔慌有星星影,繼續厘響營入面玩電話,不過帶左兩個USB電都推唔郁部機,KEEP住用1%黎玩,最後要開超級省電Mode先叉得郁。