元旦日出@罾棚角咀

2015年12月中,在業Sir呼召下我地加入左2016日出隊,1月1日為要避開人潮又要近近地找2個地方睇日出,決定出發去罾棚角咀,感受天涯海角Feeling,不過原來係崎嶇山路一條,要全開勇氣值先攪得掂。

路線：東壩>浪茄>浪茄仔>罾棚角咀>浪茄仔>浪茄>東壩

喺Whatsapp夾物資同時間效率好高。31號攪埋手頭少少野就出發,5點同業Sir已經到左,二人先去買邊爐宵夜同早餐,極度慢行都係一個鐘就買完,唯有六點就去搵晚餐食,邊食邊等。

食完吹多成個鐘水終於7半齊人,再陪食就打的入東壩了,未見過萬宜路咁多車同人,一路單線雙程行車,一段平時半個鐘鬆嘅路咁就飛左9個幾字了。

$110入到東壩,仲係不停有的士駛入,不停咁估啲人會去邊玩,後來發現大部份都係浪茄同東壩。成九點鐘下行裝就起步,路上吹水發現大家今日都出現左放飛機情緒,可以5人成團真係好值得珍惜。

一路就咁殺落浪茄,路上都係你過我我過你咁成條梯都係人,到浪茄見到成條倒數村就咁建立左出黎,熱鬧度100%,以為已經Full哂點知行近麥徑2段都仲有好多位可以起營,頓時了解到浪茄嘅幅員遼闊。

往浪茄仔要到沙灘尾要搵路過河,決定喺淺水處行過去,攪左一陣,翌日發現可以喺沙灘邊就咁行過去。

經過輕鬆易行嘅麥一,就轉入崎嶇嘅山路去浪茄仔,絲帶同方向都好明顯,不過啲險位都幾險下,又懸崖又落石又長草咁,諗返業Sir呼召時對路線嘅輕描淡寫,雖然佢有一句叫我地盡量輕裝,都係有一種比佢Fake左嘅感覺。

幾辛苦下終於開始下降,一路駛出落石技,要即刻提同伴做防護,最後一段見到條游繩已經知賴野,60度壁Full gear好在有條繩拉下。

到浪茄仔,冇人,個灘都幾多垃圾,又過河終於開始上罾棚角頂,為左早半步上到頂,就連順路嘅長排頂都唔上了。路上又係崎嶇山路,仲有風化地貌,又係成個山都係路,free style任你點行。

上到125米位置搵左兩個位置起營,一個大風而平草地,一個斜加石底But細風啲啲,喺大風位試起Fly先,一起好就大風到吹爛左,唯有又去細風位再黎過,就算喺細風位個Fly都再爛多D,而大家個營都係起喺石頭上面 =_=”………..

凌晨一點打起邊爐上黎,大家又攰又眼瞓咁食野,食食下業Sir突然決定熄爐瞓覺,呢d就係當機立斷了,為大家成功爭取多半個鐘嘅睡眠時間。

開始瞓就有人經過,應該係兩小隊,呢個鐘數到應該都唔諗住瞓啦我估。

瞓得好差不過都叫瞓左兩個鐘,hp回復到80%好滿意,6點半日出,6點就出營上山頂,見到唔錯嘅日出,不過都係無緣一見水平面日出。大家就狂影相。

見到有啲雲霞,睇黎有多少睇頭。

喺山頂再返營地食早餐完再出咀玩,本來業Sir打算帶我地落佢15年前落過嘅罾棚角罉,不過佢視察完環境話冇信心,應該係對我地冇信心。就搵個位下玩下佢D繩藝裝備,咁又玩左成個鐘~

又回營地pack野走人,沿路回程睇返尋冇太黑睇唔到嘅浪茄仔,日頭睇果然靚好多。

過左浪茄仔去浪茄條路唔上繩路行遠少少不過平坦DD,full gear上山又唔夠瞓好疲下。

捱埋最後一段上斜上返東壩就求其搵架的士返西貢市中心,食埋個TEA就懷著依依不捨嘅心情強勢返屋企。