輕舟探遊大小交椅洲

繼上年跟古浪聚獨木舟會小試梅窩去籮箕灣，今次提升小小難度去大小交椅洲，途經迪士尼碼頭、坪洲，近距離觀看澳門船，來回28K路程比我地分左兩日完成，輕鬆度即時提升100%。

2016年3月26日

▲跟會長去梅窩嘅津津食店咪咪摩摩食埋個早餐A，食完佢先介紹返最出名係蟹蒙，只限假日供應。

▲返艇會Pack左成個鐘野，一點先落水。見年輕人單挑練K艇未免太強，同佢講聲加油就上路了。成年冇玩舟，到上艇果刻個感覺先返到黎，開波就向左走先過梅窩碼頭航道，其實都唔係太多船，稍等一陣就可以安全渡過。

▲一起步都算風平浪靜，比我熱個靚身先，過左萬角冇幾耐就去到狗虱灣爆品倉庫。

▲再東行坪洲方向穿過大利橋遠少少去埋迪士尼碼頭，不過冇咩咁特別，力唔係多，就唔上岸了。

▲係時候南行去是日過夜地小交椅洲，出發前Google map顯示有兩個細沙灘，不過唔見水源，乖乖地帶左7L水入去，水嘅問題唔難解決，最難攪係水漲時個小灘仲存唔存在，4點強勢登陸，目測沙灘個水線離到個灘頂唔夠兩個營位，如果大漲我諗係有機會可以深夜游水的，就決定駛出久仰嘅岩岸過夜技，視察完畢，正想Unload之際會長說:係時候去坪洲食Tea了。

▲為左全力配合會長，開始撻皮嘅隊員都大力支持呢個決定，一句怨言都冇。一個小交椅坪洲來回成功增加左4K嘅航行里數。

▲繼續冇風冇浪模式行進，勢估唔到小弟第一次到坪洲會係獨木舟而來，經過泊滿舢舨嘅內灣就登陸了。跟住熟路嘅會長兜左好多個圈終於搵到一間未打洋嘅麵鋪-金牌粥麵，又幾好食。瘋狂食左一大輪就走人。

▲黃昏走人，水上回望坪洲日落覺得好靚。心裡記掛住仲未set場，只好駛出例牌嘅歸心似箭技衝返小交椅洲。

▲日落時份set set下場已經天黑，其實喺岩岸過夜又有咩唔好，周圍都坐得，又唔會入沙，加上未係夏天，除左蚊之外就唔見其他昆蟲，不過，係好多好多蚊。

▲野性嘅會長出手取得少量鮑魚、鬼爪螺同一啲未知嘅生物加食送，不過先食乾糧晚餐，取其方便快捷。

▲食完吹水，吹吹下突然好光，以為邊度爆炸，原來係對面迪士尼放煙花，史稱兩個人的煙火。Set好相機，影左兩張，原來已經放完。(可惜到咗而家已經唔再放煙花了)

▲食埋啲海鮮，喺冇調味嘅情況下我覺得OK啦。會長就猛話好食。

▲抬頭一望滿天星，盡力影左幾張。

▲影到冇野影，再去返沙灘一睇青馬、汀九同昂船洲大橋全景，呢個View未免太屈機了。

▲再夜啲，大大個月亮出左黎，睇星嘅難度又提升左。

▲雖然已經搵左最平最大嘅兩塊大石黎瞓，不過都係太斜，成晚Sir滑梯，瞓唔著，又影下相，加出沙灘嘗試睇日出不過係唔啱方向，到6點再set下個場又瞓到下喎，不過到9點比會長嘈醒左，相信佢係報5點比我整醒之仇。

2016年3月27日

▲飲杯咖啡同食塊包加一條759 power bar 就pack野上艇，懷著依依不捨嘅心情離去。

▲一起步以為直指坪洲，唔記得左係先去交椅洲綑一綑先。為左全綑交椅洲，我地先向交椅左岸出發，即係大小交椅打個8字嘅路線。初段都算細浪，撐得好開心，點知去到交椅南岸就受到長洲同港島水道吹黎嘅風同埋澳門船尾浪夾擊都有啲尖頂浪要過下，不過可以近距離同港島合照又幾好。

▲經過一舊奇石，我覺得好似一個人魚嘅側面，不過好似冇咩人有同感。

▲經過燈塔轉入東岸，又回到冇浪嘅世界。會長力太多繞入內灣一探，順便表演一下高級嘅碼頭上艇大法。

▲直指坪洲南灣前進，終於食到佢講足兩日嘅飲茶@勝興荼室，係一路推車一路同你講出埋呢轉就冇，飢餓嘅兩人見咩食咩，埋單都係位位$70，堪稱唔貴。

▲食過午餐，感受到懷舊小店模式，原路回到南灣影下舢舨就上艇返Centre了。

▲又回到萬角等兩駕渡輪駛過就返到古浪聚結束短途而豐富而好玩嘅獨木生涯。

兩日行程路線:

日行程路線: