沖繩 ‧ 真榮田岬潛水餵魚

其實今次黎沖繩係想潛藍洞嘅，上網睇話得意大利同日本先有，近來又有人講台灣澎湖都有，Any肥，都係好稀有啦即係。點知去到會合地點真榮田岬，潛水Centre話今日政府宣佈太大浪，藍洞收皮一日… 唯有轉戰佢話都一樣咁靚嘅真榮田岬啦唔係點唧。

介紹返去日本之前都係裝返個Line好啲，好多潛水Centre都係開架得個迷你Logo嘅貨Van去，我就係冇Line搵唔到聯絡人，所以行哂成個停車場先搵。

交通: 120號巴士由那霸去久良波站，行15分鐘

設施: 好齊全，有沖涼房有廁所，仲有Locker。(http://www.maedamisaki.jp/sisetu.html)

不過沖涼要200 Yen; Locker每開一次都要100 Yen，千祈唔好以為好似香港泳池咁順攤會比返個5蚊你。

換衫攞齊野，簽張生死狀就出發，去左浮潛先。

大家掹住教練個水泡出海，夠陰濕的話唔踢Fin都可能得。

都幾多魚睇，中間仲會攞啲海參海膽比你影相，當然都唔少得派麵包引魚仔玩法。

淺水區魚唔係咁大條，之後就去另一個位玩Scuba Diving。

雖然係Fun Dive，不過目測都落到4-5米，部機唔夠電就冇影相了，由佢喺Video mode拍至耗盡收皮。

真心講句，呢個位置珊瑚同魚嘅密度同誇張度都唔算高，我諗如果潛到藍洞會吸引好多。

換埋衫出黎，冇揸車嘅我地搵教練幫手Call的士，上車同真榮田岬講bye bye。