fbpx

盛夏繼續露營! 十個清涼退熱小貼士

每當夏天來臨,就會有好多露營友決定抖暑,一休季就休到十月先再出動。大拿拿差不多半年時間,露營重症患者一定吊癮吊得好辛苦,望營輕嘆。所以決定拋磚引玉出文講講十個夏天營散熱方法,還望各露營友不吝賜教,集思廣益一齊探討散熱良方。



01|主打玩水

夏天露營主題當然係玩水,所以近山澗或者海邊營地都會比較旺場,日間可以玩水浸水游水降溫;夜間有海風或者溪流帶動空氣亦較涼爽。而水打擊石澗中的石頭會釋出負離子,加上擊水聲,夜深人靜感受一下大自然,心静自然涼。

02|慎選營地、營位、營帳

出發之前睇定天文台當日吹咩風,香港位於沿海,受海洋性氣候所影響,日間大部份時間吹向岸風,即東南風 ,而晚間就會轉向為離岸風,香港夏天大部份時間吹東南風,向東南嘅營地應該係首選。試過吹東風嘅日子去向西南嘅貝澳,真係熱到不得了。

除左營地之外,仲有營帳嘅方向、門口入風位都要在起營時認真對待。營幕外帳對流效能以及單層/雙層(Layers)對於營內溫度有很大影響,事關一隻能兩門大開的營幕與單門已有得大的分別。而新款式的金字塔營就主要係由下而上的對流,散熱效果不錯。

03|樹蔭位

可以喺樹蔭下起營係一種福氣,確保左唔會一日出就比太陽曬醒熱醒。可以的話更加要計準日出方向,扎喺樹蔭嘅西面。大樹好遮蔭,但同樣有壞處就係會吸引昆蟲,最怕係沙灘樹蔭位的沙虱。

04|天幕 (Fly) + 蚊紗/內帳 玩法

現時有內外帳分離嘅設計,或獨立使用的紗帳,夏天可以只起通風的內帳,另外再加起天幕以遮太陽、落雨、霧水。等啲生風吹到入紗帳。但呢個Setting當然大大減低左私隱度,換件衫都會暴露人前,喺人跡罕至嘅營地或者豁達者可以一試。



05|冰水水樽

如果安排得好,冰水水樽係散熱良方之一。瞓時放喺身邊真係可以減低一兩度,嫌一兩度少就攬住黎瞓啦。要安排嘅就係要早一晚張成個水樽雪做冰,攜帶時要幫佢保冷,例如用保溫溫袋或者七層報紙包裹,不過本人建議都係用大毛巾較好,一來可以索返由水樽冒出黎嘅水珠,二來唔似得用報紙咁製造山野垃圾。最後,支冰變返做水嘅時候,當然要用埋黎飲或煮食,咁就唔駛無意義負重啦。

06|電風扇

想當年,只有兩粒AA電推動風扇仔嘅年代,帶風扇去Camp係一件麻煩到不如唔帶嘅事,唔通每半個鐘起身換電一次咩。自從USB電出現同埋鋰電容量大突破,要長著強力風扇一晚半晚絕對係輕而易舉,電風扇甚至乎成為左夏天去露營嘅基本裝備。由於近年USB電改變了露營生態,有大大會帶水冷型式的手提冷氣設備,務求令到露營有家的感覺。

07|濕毛巾敷身

試過熱到一個點,熱到燥左,彈起身又檢視一下手上物資,決定用毛巾敷喺身上,熱力剎那間蒸發唔少,前提係要除上身衫打大赤肋,所以男士會比較適合。近年市面亦有出現冰巾, 即濕水後有涼意的毛巾仔,幾爽下。

08|爽身粉

有一件小道具不得不介紹一下嘅,就係爽身粉。無論之前點樣沖冰水涼,入到營要瞓時已經又出汗了。除左瞓著唔理之外,可以用爽身份搽喺身上,即時感覺會舒服好多。另外有前輩推介蛇粉,便宜又好用,涼浸浸。



09|蚊怕水

今次唔係講驅蚊,話要帶蚊怕水係因為當你熱到不能再留喺個營入面,自然就會寧願瞓街,呢個時候一定會希望自己有帶「足夠嘅」蚊怕水。驅蚊各施各法,各位露營玩家都有自己秘方,例如燒艾草,燒柴,精油系的香茅油,甚至平平地買盒傳統蚊香…

10|千其唔好燒野食

多年前自己對露營加燒野食有一份執著,咁就要承受比個火熱足半晚,再食啲熱辣辣嘅野食。近年發現夏天又唔一定要食熱野嘅,食下冷麵食下壽司可能仲開心。

講咗咁多,無非都係想大家多個方法可以夏天去Camp去得舒服啲,Enjoy啦~

發表回覆

你的電郵地址並不會被公開。 必要欄位標記為 *