容易被忽略的 — 7件露營煮食用具

當你初入露營生涯，又或者好似小弟咁啱啱發現美食Camp嘅樂趣，對於露營煮食用品都可能會有一種迷茫，當然爐具Cookset你唔會唔記得帶啦，咁有啲咩係細細件，令食物提升好多，又或者係今各位大廚方便啲，而又好容易被忽略嘅嘢？

無論喺山店定係超市都可以搵到呢啲現成嘅調味料組合，細細樽就齊哂章。再唔係可以好似小弟呢個由藥盒轉化而成嘅版本，仲可以進一步度身訂造放入自己用得著嘅嘢添。

錫紙多用途到一個點，最明顯當然係包好支栗米就掉落火，Cookset 都慳返。除此之外更可以磨刀、摺漏斗，好用到唔帶唔得。

雖則話我地呢啲出黎露營嘅，污糟少少係等閒事je，但點都唔可能就咁放塊肉落地下切咁突破㗎。一塊迷你砧板就解決哂呢個問題。

好多戶外客唔只行山露營，就連出街帶水都會用Nalgene或者Columbia嘅硬式水樽，有冇留意上面係有刻度可以用嚟量份量？加上部份款式係耐熱設計，夜晚煲水後放涼亦可，一物用到盡！

講明美食Camp，斷估唔係煮一餐呱。唔想用洗潔精怕破壞環境，清潔餐具最好就係用茶籽粉啦。BTW就算真係煮一餐，最好都係即刻洗咗佢好啲啦。

去露營嘢食唔駛下下特登去買嘅，可以打開雪柜睇下有咩啱駛。用密實袋分門別類細細包放入背囊夠哂方便，記得唔好咁粗用整爛哂個袋，因為一個密實袋其實可以用好多次ga。另外仲有一啲用矽膠造嘅密實袋，大家可以考慮下。

唔係叫你行到去營地沖杯安咩健嚟背充骨骼鈣質，雖然都可以，而係有時煮起西餐上嚟加奶真係香濃好多；另外朝早起身飲奶茶咖啡都用得著！

上面呢7樣嘢係好易帶不過又唔會醒起嘅，即下又啱唔啱你駛。下次諗到有咩好嘢再同大家分享~