山竹殺到停水停電點算好？7件裝備盡顯優勢！

超級颱風話咁快明天就殺到，除咗儲水儲糧之外，我地呢啲有玩開Camping嘅人，平時比人指指點點又話阻掟又話嘥錢咁，今次終於威水返次，就係攞哂所有露營用品出嚟將佢地唔駛插電、靈活及細細件嘅好處發揮到盡，分分鐘仲可以作為求生用途添，畢竟戶外裝備本身就好大程度係為求生、求救而設。到底喺露營背囊入面有乜嘢係用得著呢？

01｜營燈

如果夜晚突然停電的話第一時間影響嘅當然係睇唔到嘢，唔小心撞到好容易會造成二次傷害。Campers點都有一兩盞營燈，一開著成家人都有返哂安全感。

02｜爐頭Cookset

如果屋企用電磁爐，停電就真係煮個麵食都唔得。爐頭Cookset就幫到手，記得趁今日仲落到街買定Gas喇。

03｜貯水袋

好多大廈係用電泵泵水，所以一停電就連水都冇埋，當然喺屋企攞個紅A入水係要，如果有露營用貯水袋，部份產品設計上會比教接近水龍頭，控制出水量亦佳，可以做到省水效果。

04｜萬用刀

又講返停電，喺亮度不足嘅情況下，如果家中有緊急情況需要維修，你絕對唔會想去摷工具箱。呢個Moment如果有萬用鉗等小工具，實在非常方便。

05｜哨子

如果大家仲記得天鴿橫掃澳門嘅畫面，都會明白求救嘅可能性係存在嘅，唔係想危言聳聽，事實上小弟仲係相信香港嘅樓宇係有返咁上下，不過仲有唔少人係住喺舊樓、村屋，萬一水浸或感受到潛在風險，需要求救時除咗電話，哨子、閃光電筒等都係有效嘅求救工具。

06｜外置電源

如唔鐘意叫尿袋，所以都係寫外置電源。戶外友應該都明白佢有幾咁重要，基本上想維持停電時一日半日都仲有電話玩，有個叉滿咗嘅外置電源會令人好放心咁食雞。

07｜巴蕉扇

小弟夏天去Camp會用兩把巴蕉扇做對流扯風，所以風扇仔都係裝備之一，而家仲係夏天，打起風上嚟停電又關門窗，就算唔熱都會焗，開啲風吹下人都精神啲。再加上巴蕉扇入面粒18650配合適當裝置又可以作為外置電源使用，用途多多。

講咗咁多，都要講多句上面講嘅大部份都針對冇事冇幹時，添加一啲方便性、舒適度咁，如果情況真係好差就當然係報警同埋盡快去到安全地方暫避啦。

天祐香港。