行旺角有發現！木製食具$19.9有售

風球剛過去嘅星期一，工作原因一闖旺角途經一間又啲MiniSo Feel嘅NOME，賣生活雜貨。見佢有啲Design其實又幾靚大鄉里出城又入去行下，本身都冇諗過買露營嘢，點知又比我見到呢兩Set木製餐具，唔好諗咁多即刻入手。

心儀木製餐具已經好多年，曾經喺日本同HKD$10一隻叉擦身而過，喺香港某啲大百貨公司見到又太太太貴，反正唔係冇得用就一直冇買，所以今日一見到$19.9有兩隻就入手把啦。

可惜唔係一Set叉+匙，而係兩支叉兩支匙咁賣，唯有乖乖課金買兩Set。

到出文之前都未用過，所以只以外觀評價一下，不過攞上手嘅感覺唔錯：
1. 首先摸落係硬淨嘅，萬一用用下崩左亦都可以考慮自己打磨一下；
2. 真係好輕，雖然輕唔過鈦不過肯定輕過不鏽鋼好多；
3. 耐熱，只以木嘅特性估計，點都唔會遇熱溶化呱、而且隔熱。

當然佢冇得好似金屬甚至塑膠咁做到好薄，所以體積唔算細，不過如果計埋佢嘅優點，我認為值得帶去露營，下次用嚟去Camp時再同大家認真報告吧！