fbpx

迎接Wildcamp季節! 買露營背囊先諗5個問題

望穿秋水嘅露營季節就快重臨大地,任你幾鐘意露都好,夏天去Camp點都冇秋冬去咁舒服。今次一於講下其中一樣最重要嘅露營裝備-就係個露營背囊了。

人最緊要係了解自己,所以揀合適露營背囊,一定要先問問自己4個W 1個H。



01|Where – 通常去邊度露?

唔係講你想喺邊買,係講去邊露營。如果多玩長途跋涉 Camp,所有裝備帶上身,負荷系統就好重要了,如果要負重行30 Km,背負系統唔能夠有效將重量分攤,可以話係一場災難;如果係多玩休閒型,落車落船就到嘅Campsite買個入門版露營背囊,留返啲錢買其他Gear享受下就更理想。

02|When – 季節

咩天氣去Camp對露營背囊大細影響好大,冬天比夏天要多帶嘅一堆厚衫厚褸、地蓆睡袋加加埋埋都佔左半個60L,而且冬季用嘅四季營、禦寒裝備點都會有返咁上下份量。

03|Who – 同咩人去?

通常會幾多人去? 可能更重要嘅係 – 同邊個去。

如果一大班有去開露營嘅朋友去,好多物資都可以Share得到,你鐘意張個營拆開哂一個攞營柱一個攞天幕一個攞蚊帳都唔係話唔得。咁正常就你帶營我帶食具佢帶燈咁啦,大家Share好重量就可以攤分,買個40-50L就可以去個Camp; 如果你鐘意同女友二人世界,又要做暖男揹哂啲野上身,等女友輕輕鬆鬆鄧梓峰式咁玩,就可能要入手70-80L了。



04|What – 鐘意咩玩法

而家見好多巴打絲打玩Ultralight,一個25L就Camp得,真係好勁。另一個極端就係重裝玩法,一個人帶8人大營加又檯又櫈咁,再加個大型焚火台,喺體能所及之下,有咁大買咁大就啱喇。

05|How Much – 預算有幾多?

價錢係一個唔可以亦都唔可能唔理嘅因素,因為呢樣野某程度上反映左負荷系統嘅性能、品牌、耐用度同埋Last but not least嘅美觀程度。露營背囊當然要有返咁上下高可靠性、便用性、以至美觀程度相信各大品牌都有投放資源去研究,要搵返個CP值性價比高的背囊就要做下功課。咁另外更加重要嘅當然係個人嘅經濟能力…同埋為左去露營捨得比幾多啦。

諗掂上面堆野,基本上都對要買個咩背囊都有啲概念了,下次再講埋至關重要嘅Back size、負荷系統等等。



發表回覆

你的電郵地址並不會被公開。 必要欄位標記為 *