肉身測試 用Lifestraw帶少3L水
一大班朋友去灣南露營,其中新手亦有唔少,除咗自己裝備,再帶多個營加呢樣嗰樣咁,一個60L大袋剎那打爆咗,堅持唔手持嘅小弟諗嚟諗去點樣可以再令個背囊更多位用,第一時間諗到嘅係不停煲水,but就唔環保同埋下下睇住個火其實都幾煩,思前想後決定入手一個傳說中嘅補水神器Lifestraw﹐順便徹底肉身測試到底filter出嚟嘅水飲唔飲得過。
話哂大嗱嗱成三百幾蚊,睇咗好多好多資料先出手,得到嘅答案係chemical濾唔到、當然亦都海水化淡唔到,不過微生物就99.9%都會濾走咗。再上Youtube睇埋d 外國人點樣飲自己啲尿同坑渠水咁,雖然唔知佢拍完片之後點,但係仍然登時信心大增,唔信自己睇下。
喺咁多種Lifestraw入面揀咗軟式水樽,首先就係方便裝水,唔理係溪流定洗手盤,軟身水樽都總有方法屈入個水源;另外更重要嘅其實係,軟身先可以用「擠」的,即係入咗生水之後,由樽身經話lifestraw擠出嚟,share比人飲或者過濾咗先煲又得。
雖然係去灣南,又已經唔係山澗水,講到肉身測試係有啲跨,不過相信都係大部份香港人露營嘅情況。所以一到埗第一時間就去洗碗槽斟水(仲未做得出入廁所斟水飲,好似幾核突下)﹐ 喺屋企已經用跟機嘅大針筒反覆抽水噴水幾十次,有理由相信已經適合使用。
第一啖好大機會係清理時嘅水尾,照吞無誤,其實係出奇地好飲,再飲落去連續飲左十啖,因為要靠啜,所以其實飲得唔算多,同屋企煲嘅水比較起嚟係好味好多,因為冇哂水喉嗰陣味,由於小弟並唔係食家,所以關於水嘅味道只係寫到唔多。
開始用時飲水要幾大力啜,甚至用用地心吸力幫手,不過後來就已經同平時用飲筒飲嘢一樣毫無障礙喇。
之後再嚟煲水沖咖啡,又試下擠水效果。都算唔錯好快就擠夠一杯嘅份量,而另外Lifestraw係有專用款式用嚟大量過濾水嘅,邊樣啱自己就睇玩法而定啦。
飲咗兩日最後都冇半點唔舒服,可以話係信得過,起碼令我帶少幾L水,真係功德無量,官網指Flex 可以用嚟過濾2,000L水,每日用可以用6年,穩陣啲就用到feel到難啜,即係開始塞就好換喇。另外收納起嚟真係好細,我係張佢放喺側網個金屬水樽隔離條隙度嘅。
使用貼士
僅憑我用咗一次嘅心得,我會建議大家如果係去露營,不妨好似我咁一個金屬水樽加一個Lifestraw Flex﹐Lifestraw 可以直飲,如果天冷想飲熱水就濾完煲滚入金屬水樽放涼待用。
如果係行山,我會當Lifestraw 係backup﹐不過預水量就可以預得啱啱好,唔駛刻意帶多半日水。你仲可以考慮配合水袋嚟用添,咁就每一口都係濾過嘅水。
咁當然,前提係你已經做足功課你去嘅地方係有水源啦。
最後比多少少spec大家睇下
重量 Weight |
167g
|
容量 Volume
|
650ml
|
產品特色 Highlights
雙層過濾設計,第一層中空纖維膜能過濾99.999999%細菌及99.999%寄生蟲;第二層活性碳膠囊能減少氯氣,改善氣味及口感,減少有機化學物質(如殺蟲劑、揮發性有機化合物) |
通過NSF 53標準,能有效減少鉛及其他重金屬 |
通過NSF 42標準,能有效減少氯氣 |
通過US EPA飲用水標準 |
能確保水的純淨達log7-log8,達發達國家自來水乾淨水平 |
可過濾多達2,000公升的水量,假設每天使用,可持續使用約六年 |
不含BPA及其他化學物質,沒有任何異味 |
沒有儲存期限,可購置家中以備不時之需 |
可獨立使用,亦可配合專用軟水樽、一般膠水樽、軟水袋及大型水袋等使用 |
附送650ml專用軟水樽一個 |
原料符合美國食品和藥物管理局的法規和標準 |
PS. 事隔一星期,寫文之時身體仍然很健康。