初探獅子山

大家有冇一d好出名，好值得行但又冇行過嘅山？小弟就行左幾年山，蚺蛇尖鳳凰山都去完又去，偏偏睇黎幾方便又別具意義嘅獅子山從未一遊，今次同港島老友行山聚舊，本住一人行一步嘅公平原則，一於行九龍嘅山，就獅子山啦。

睇咗幾個遊記，帶份地圖就出發，選定竹園北村起步路線，原來由黃大仙站行去起步點一啲都唔輕鬆，行咗成20分鐘，中間去咗食蛋撻大休添。

誤入天馬苑，攪一大輪先成功脫出，去到登山口睇黎都只係一個小路入口，又蚊又垃圾咁，唯有頂一陣希望下一秒會更好。

晨運小路上，好多磚呀石屎呀咁，睇黎都係亂掉裝修廢料，可惡。上多十分鐘情況好轉，一直領先嘅叔叔們不停提場教路，不過我地想先掂下雄師拉矢石，講開又講，呢個名真係又有氣勢又核突。

林間小路續行，行得近其實都睇唔到d 乜，又冇心攀登，駐足一陣就走。再行十鬆分鐘，本打算一直沿地圖虛線路直上，不過睇黎難度太高，決定横移回大路稍後輕鬆上頂。

一回大路先知原來咁多人行獅子山，而且風景亦好左好多，沿途唔少觀景台，風涼水冷，我地時間鬆動，亦都做左不少小休。

愈接近山頂，路況收窄，亦愈多行友。獅子山路不險，險嘅係大家都鐘意行到崖邊影險相。不過影出黎真係幾型。

唔可以唔提景色亦真係一絕，俯瞰整個維港兩岸，如果好天一定更癲。

上上落落終於一登獅頭，下山順get一個筆架山。

好唔容易筆架山道點回到文明，已極肚餓點知想食嘢都行咗半個鐘去到石硤尾先揾到碗米扇食下，一個大半日旅程又完成，獅子山gotcha。