香港10個收費營地介紹

露營太多人唔夠清靜、驚比人嘈足一晚冇得瞓，諗住去放鬆下反而攪到著哂火？效法日本、台灣試下付費營地又如何？唔講唔知原來香港數埋都唔少收費營地，今次就為大家介紹非牟利機構/私人營運嘅露營地點先！

01｜長洲西園

新鮮滾熱辣，呢兩個月先開始推出野營玩法嘅歷奇園地，最吸引小弟嘅係呢度40萬尺場地，走動空間多，加上超級乾淨嘅冷暖水浴室洗手間，啱哂一家大細比小朋友盡情放電！各種配套都去到一流級別，而平日收費都只不過係$400一個四人營，大膽講句係香港收費營地之中最吸引嘅一個。

▶️歡迎公眾人士申請
▶️亦可預訂租用露營用品
▶️收費｜週日至週五 – $400/營 ； 週六及公眾假期) – $500/營 [每個營帳限四位營友入住]
▶️交通｜於中環5號碼頭乘船往長洲 (快速船航程約35分鐘，普通渡輪航程約1小時) , 或於香港仔海濱公園旁浮躉乘船往長洲 (航程約55 – 65分鐘)，然後可以選擇以步行、踏單車或乘街渡前住西園。
▶️按此查看報名及詳情

02｜（香港島） 賽馬會摩星嶺青年旅舍

從來同露營絕緣嘅港島終於出現一個營地，仲要係好高質嗰種，呢個設施齊備嘅摩星嶺營地，仲比大家居高臨下咁睇住個海景，真係Hea都Hea得開心啲！

▶️歡迎公眾人士申請
▶️須預訂租用露營用品
▶️收費｜(非繁忙時段)會員價港幣300元（兩位），其後每位另加港幣140元 （最多4位）；(繁忙時段)會員價港幣380元（兩位），其後每位另加港幣140元 （最多4位）
▶️交通｜堅尼地城港鐵站免費專車
▶️按此查看報名及詳情

03｜東華三院馬草壟營地

(2019年5月1日起停辦汽車露營)

早前好多報紙雜誌介紹嘅營地，賣點係可以開埋架車入去一嚐汽車露營玩法，對於有車人士嚟講真係一大喜訊，淨係唔駛搵地方泊車已經好好。不過一個月只會開幾個日子比公眾申請露營，申請唔係即時確認，唔容易做準備。

▶️歡迎公眾人士申請
▶️可預訂租用露營用品
▶️收費 — $120 / 每名成人
▶️交通｜由上水港鐵站乘坐51K往馬草壟綠色專線小巴，於馬草壟營地下車。車程15分鐘。
▶️按此查看報名及詳情

04｜創興水上活動中心 (萬宜水庫西壩)

每次行到西壩，除咗見到好多朋友喺度玩風帆，偶然仲見到營帳添，其實你都可以只要申請就得喇，尤其是流星雨等天文現象嘅時候，呢個出名低光害嘅地方就大受歡迎。

▶️歡迎公眾人士申請
▶️可預訂租用露營用品
▶️收費 — $24 / 每人每晚 (四月至十一月) / $14 / 每人每晚 (十二月至翌年三月)
▶️交通｜專車往返 – 西貢鄧肇堅運動場停車場
▶️按此查看報名及詳情

05｜YHA昂坪戴維斯青年旅舍

大嶼山昂坪本身都有一個政府營地，查實仲幾方便添，不過唔少人都試過多人到搵唔到位札營，所以昂坪戴維斯青年旅舍嘅出現又比多一個選擇大家。

▶️歡迎公眾人士申請
▶️可預訂租用露營用品
▶️收費 $540 起，其後每位另加$180 起（最少三位，最多六位）
▶️交通｜2號（梅窩至昂坪）或23號（東涌市中心至昂坪）步行9分鐘至旅舍
▶️按此查看報名及詳情

06｜YHA白沙澳 青年旅舍

唔算有咩靚景嘅白沙澳青年旅舍，不過鄰近海下，鐘意玩浮潛嘅朋友不妨在此過夜然後到海下欣賞海底下嘅自然美景！

▶️歡迎公眾人士申請
▶️可預訂租用露營用品
▶️收費 $540 起，其後每位另加$180 起（最少三位，最多六位）
▶️交通｜綠色專綫小巴7號 (西貢市中心至旅舍)
▶️按此查看報名及詳情

07｜YHA (西貢赤徑) 白普理堂

就喺出名又靚又幅員遼闊嘅赤徑，落船就會見到有樓梯直上白普理堂，Set 好個場之後又可以遊山玩水，肯定夠玩足一日一夜！

▶️歡迎公眾人士申請
▶️可預訂租用露營用品
▶️收費 $540 起，其後每位另加$180 起（最少三位，最多六位）
▶️交通｜乘坐94或96R巴士到黃石碼頭總站，再轉渡輪到赤徑碼頭
▶️按此查看報名及詳情

08｜YHA （荃灣大帽山） 施樂園

喺度露營唔可以唔乘住地利，一大早清晨時分登九百五十七米的主峰觀賞日出、日落，之後再去飲個靚茶寫意人生一下。

▶️歡迎公眾人士申請
▶️可預訂租用露營用品
▶️收費 會員 $85 起 非會員 $100 起
▶️交通｜乘坐51號巴士到大帽山道及荃錦公路交匯處，再沿大帽山道步行至旅舍
▶️按此查看報名及詳情

以下兩個營地雖然只接受團體報名，不過佔地極廣喺度露都露得自在啲，建議有興趣嘅朋友睇下有咩攪 Camp 嘅團體喺度攪活動了。

09｜香港童軍總會基維爾營地

▶️只接受團體申請
▶️可預訂租用露營用品
▶️收費 $26/每位 (最低收費為25個營位費用)
▶️交通｜乘搭九巴91、91M或92號線在「德望學校」站下車，再沿清水灣道及飛鵝山道步行45分鐘前往
▶️按此查看報名及詳情

10｜香港女童軍總會博康營地

▶️只接受團體申請
▶️可預訂租用露營用品
▶️收費 $80/非會員每位
▶️交通｜港鐵沙田站乘搭小巴809K(於女童軍博康營地下車)
▶️按此查看報名及詳情

睇完以上介紹係咪心郁郁，不過有部份營地須早三個月預訂，有興趣嘅朋友想 Book 就要預早安排喇！

相片｜各營地 FB 及網站