極輕極細極平！乳膠地蓆取代品
記得第一次去露營係瞓乳膠地蓆，又大舊又唔好瞓，除左平之外其實冇乜好處，有啲唔生性嘅新手仲會嫌阻地方，camp完即掉添。相信大家都有見過喺camp site 附近嘅垃圾筒充滿咗｢一次性｣嘅露營裝備啦。
其實除咗乳膠地蓆，不如考慮下呢張淘記有售嘅透明充氣墊，吹漲都有6cm厚，論禦寒能力相比幾百蚊一張嘅靚嘢唔太輸蝕，而且摺起上嚟更加細更加輕。
前前後後都用咗十次八次，最後係一如所料咁死喺氣咀漏氣，試過用duct tape(當然) 都係救唔返，而到咗而家佢就成為一張唔係幾夠大嘅營底墊。
缺點當然都有，就係嘈，真係好嘈。因為完全係一個硬膠袋，基本上瞓咗上去就郁下都會響，而且啜肉，著長袖長褲都還好，如果有裸睡習慣應該都幾唔舒服。
上個月同好多新手朋友去camp﹐佢地問買咩地蓆好，係咪帶屋企張瑜伽蓆去，呢個問題都真係幾多人問，但其實又重又唔夠厚，正路就買乳膠，不過真係驚佢地見阻地方用完完即棄，就建議呢張啦。
綜合返大量(約20個) 使用者嘅意見，充氣地蓆係值得新手入手，或者老手買嚟做個後備嘅，事關：
1. 基本上係好瞓嘅
2. 輕，以Full size嚟講好有機會係最輕最細嘅地蓆
3. 厚，完全唔覺地下嘅寒意，側睡都冇問題
4. 長，長到可以屈包返一段嚟做枕頭
注意事項：
1. 有小朋友嘅，要留心唔好比佢地一嘢企上去，如果泵太漲的話踩上去真係驚會爆。
2. 用口吹氣唔係唔得，不過一定會見到口水造成嘅霧氣好核突下，所以最好都係帶定電泵。
3. 短命，同另一個朋友一人一張，兩張都用唔夠十次就漏氣，最怕係天寒地凍佢function唔到。曾經見過另一款係雙氣囊設計，上半截漏氣仲有下半截可以用，搵到嘅話貴幾蚊都係抵嘅。
最後講返，新手入門露營裝備最好係借到就借啦~
