搭到厭都仲要搭! 戶外友一定坐過嘅4種交通工具

喺香港玩行山玩露營，好處係交通四通八達，話知你住喺沙頭角，要去到行山起步點都係個零鍾嘅事，如果有揸車嘅山友就更加係爽到一個點，不過又咁講，除非你係當地居民，唔係嘅話去到西貢或者大嶼山，你有車都會比個禁區Block左，所以有啲熱門營地同埋登山口，點都要靠公共交通工具先入到，偏偏大部份呢啲交通工具又經過好多熱門郊遊路線，如果你一年行十次山，分分鐘要Encore一架車五六次，真係搭幾耐，幾錢，幾時有車都記得。

九巴94號  西貢市中心<>黃石碼頭

唔駛講，使用概率去到巔峰嘅首推94號九巴啦，淨係睇啲巴士站名都已經知全部落車都已經可以起步行山。

如果你係水上活動發燒友，大環、斬竹灣同埋黃石碼頭總站都有大大小小嘅水上活動中心;

去到北潭涌又可以行下上窰家樂徑;

北潭凹就更加係熱門中嘅熱門，無論係去赤徑露營，定係上蚺蛇尖，呢度都係最常用嘅起步點;

好咧，要再User Friendly啲嘅營地，可以繼續搭去大灘，或者由呢度起步去猴塘溪行石澗都得;

最後去到黃石碼頭總站，除左水上活動中心，其實都仲有個蚊型營地同大型燒烤場，不過我諗更多人黎呢度係為左上大飛去塔門同埋灣仔露營。

大嶼山巴士3M 東涌市中心<>梅窩

大嶼山行山露營交通工具代表首選3M，相信一到遠近馳名嘅伯公坳大家瞓著左都識得彈醒落車，基本上要上大東二東、鳳凰山甚至行走中段突入南大嶼郊遊徑都可以由呢度起步。

過左伯公坳一路落斜，望到海都就轉東行，無幾耐就到貝澳營地，全部人一齊落車都見得多，除左貝澳，亦可以由貝澳油站起步去十塱營地，或者起步上老人山睇南大嶼全景。

再向梅窩方向行進，會經過南山營地，亦都係一個十分User Friendly嘅營地;

最後去到梅窩總站，最多人係行完山，喺度食個Tea之後坐3M黎到呢度上船出返中環。

翠華渡輪 – 馬料水<>塔門

呢條渡輪線真係筆者嘅心水黎，事關呢條線居然去到香港三熱門郊遊景點 – 深涌、荔枝莊同埋塔門。

深涌最出名就係一大片因為起Golf場起唔成而留低嘅草地，曾經比村民用作出租營地用途，大概係$50一個營，而家就多人嚟野餐影相；

荔枝莊就係一大片廢田，幅員遼闊，係地質公園範圍風景一流，不過就冇廁所;

塔門就唔駛點介紹了，好多人每年都去一兩次。

29R 西貢市中心<>西灣亭

有別於以上幾款交通工具，29R唔係經好多郊遊地點，應該話佢只係由西貢市中心M記直接去到西灣亭，完全係一氣駁腳路線。

但係由西灣亭起步嘅玩法實在太多，所以一定要介紹一下。

秋冬天最住玩法當然係西灣亭起步全走大浪四灣，上唔上蚺蛇尖都好，都可以由赤徑上返北潭凹94號走人;

又或者南下經西灣山去浪茄再上東壩都得，不過要小心東壩冇的士，要有徒步行多兩個鐘去北潭涌嘅心理準備;

天氣熱亦有水線可玩，夏天好多人專登由呢度去大浪西灣游水，快步少少半個鐘可以殺到落去; 唔想淨玩海水，仲可以一遊位於西灣尾，公認全港最美石澗嘅雙鹿石澗。