夏日之選，5大熱門海灘營地﹗

好多人夏天去露營一定揀位於海邊嘅營地，辛辛苦苦揹住幾十磅去到，落水果一刻一切都係值得嘅。今次介紹5個又易去又靚景嘅熱門營地，每個月去一個，一個夏天咁就去哂喇~

不過先旨聲明，既然係又易去又靚嘅玩水營地，自然亦都多人到不得了，如果想享受一下清靜，可能要Weekday去會Enjoy啲。

好多露營友去灣南已經去到合埋眼都識路，不過都係要再去，因為設施齊全又不失野趣，海灘仔游水摸蜆都啱玩，無論帶新手去Camp定係二人世界都係一流之選。

缺點: 有好多牛，仲進化到咩都食，公仔麵同肥牛都食一餐，同埋要小心佢地喺個營隔離大小便。

人流 ⭐️⭐️⭐️⭐️⭐️
風景 ⭐️⭐️⭐️⭐️

人稱大嶼山浪茄，主要係因為由山上望落去個灘形有啲相似，論海水清澈度就當然冇得比。勝在有人流叫做少啲，又近住水口，露營之餘仲可以去全港最大型泥灘行下。

缺點: 屬珠江水流嘅大嶼山南面海灘，多少有啲簡體字垃圾喺海灘，而且營地偶然會見老鼠，所以垃圾筒少有地會見到用網做蓋。

交通東涌市中心 / 梅窩乘3M於水口村落車步行30分鐘

人流 ⭐️⭐️⭐️
風景 ⭐️⭐️⭐️⭐️⭐️

大浪四灣入面最易去到嘅西灣，個灘大到離哂大譜，又有士多群完美Support，水清沙幼唔在講，早起的人們仲可以喺個營望出去睇日出添。

缺點: 本來冇咩可以挑剔，不過營地直接設於沙灘上，出入營帳時好易入沙。

交通西貢市中心(麥當勞)乘29R村巴直到西灣亭，步行約40分鐘

人流 ⭐️⭐️⭐️⭐️
風景 ⭐️⭐️⭐️⭐️⭐️

好多人心目中香港沙灘第一位就係浪茄灣，水清沙幼，好天果陣直情覺得自己去左馬爾代夫一樣，好多人就算唔係去露營都特意去游水。

缺點: 水源完全靠一條水喉支援全個營地，見過有人黎露營點知冇開水喉，完全一籌莫展。

交通 1. 北潭涌起步沿麥里浩徑一段步行約兩小時 ; 2. 西貢市中心乘的士到東壩，步行45分鐘。

人流 ⭐️⭐️⭐️
風景 ⭐️⭐️⭐️⭐️⭐️

貝澳享有最易去營地同埋最設施齊全兩大美譽，亦係五個營地入面唯一一人個有救生員嘅泳灘，入營地前嘅貝澳村仲有飯店，帶埋小朋友去呢度Camp可以話帶個營去就得。

缺點: 就因為太方便方便到好似酒店咁，好多遊客Shopping完就黎瞓一晚，講野又大聲，嘈死人。

交通東涌市中心 / 梅窩乘3M於貝澳村落車

人流 ⭐️⭐️⭐️⭐️⭐️
風景 ⭐️⭐️⭐️