90年代行山係點樣？

香港行山或者叫本地旅遊大約可以追溯至七、八十年代經濟起飛時期開始，人民開始搵到食，工餘時間想去減下壓輕鬆下，加上一班有心嘅前輩開路(真係開山劈路)，造就左香港行山活動慢慢去到今日咁蓬勃。

即係咁，七、八十年代嘅事係知咁多唧，反而自己喺九十年代有幸跟老竇開始行山，一行十幾廿年，叫做見證左90年代初的行山與至現今的一些變化。

而家個個行山都著快乾衫、Tight褲，當年肯著套運動衫上山已經好俾面喇，牛仔褲上山仲係常態黎添。或者咁講，當年好似直情唔知咩叫Tight… 呀，當年好似會叫「原子褲」，女士恩物。

喺山上偶然見到啲神速高手，個個都係著Boot，傾開計就會介紹Boot嘅好處。今日嘅運動生理學就分那麼細，行山著行山鞋，跑山著跑山鞋，行澗著澗鞋，By the way相信呢點同物資愈來愈豐富有關。

呢點個人認為係最大嘅唔同，當年叫朋友行山，都可能試過比人話老土同埋悶，只有行山人士先明白行山嘅樂趣，實在估唔到今時今日終於見到比人覺得係潮、識玩、健康、有型諸如此類，今日就連抗疫都會上山，簡直係行山人士吐氣揚眉嘅一個美好時代，不過行還行，啲口罩咁掉喺山邊真係好賤格下流無恥下刪一百字。

記得果陣秋天行大東山，除左一個叔叔之外就全日冇見過人，而家每年秋天大家都試過上去睇芒草啦，有啲位直頭係塞住左，可惜果陣根本唔知咩係芒草。

行山嘅人都唔多，而家日日都有人練嘅跑山當時真係見都冇見過㗎。

而家好多登山熱點都有車到，班次亦算幾密；回想那些年去西灣嘅29R只係一部豬籠車、去伯公坳嘅大嶼山巴士亦都稀疏到一個點，基本上唔係預郊遊人士搭，係比當地居民出入㗎咋。

記得自己有手提電話係1996年，之前訊號係點就唔知了，不過當時基本上去到西貢或者大嶼山，一上山已經收唔係好到，當然亦唔駛旨意求救啦。

應該講個天係有GPS衛星嘅，美軍亦都用緊，係我地未有得用啫。而家自己都會懶，好多時靠部Smart Phone就行完全程，所以當時擁有巔峰嘅Map Reading能力。

唔駛我講，睇新聞都知，而家個政府唔知攪乜，得閒無事就搵個山鋪下石屎同雲石咁，交交埋埋啲稅居然用黎攪著個山；當年多數都係用木板加泥土，最多就用大舊石起梯級，又靚又好行…

公道啲講，如果只計香港人，我覺得Leave no trace、帶垃圾返市區嘅意識係高過九十年代嘅，只係而家真係多左人上山，多少有啲害犀之馬，再加上班周圍掉橙皮嘅強人，成個山頭就咁比佢地攪彎哂，要喺山上面發現一堆堆垃圾，其實唔難。

其實到咗今日，唔好話90年代，就算同2018年比，有好多嘢同早幾年比已好唔哂啦，大家明就明啦。最後再講多句天佑香港，天災、人禍都快啲遠離，康復香港之後大家山上見！