fbpx

終極保護+提升表現 ‧ ASICS新跑鞋登場 — GEL-NIMBUS 23實測

近年工作忙碌,望住個日益長大嘅肚腩只好嘆一句情況好壞。唔單只唔有型,大肚腩仲阻住行山時上斜道力,當然要認真操下。要用上山嚟Keep Fit 對小弟呢啲上班族嚟講真係奢侈咗啲,呢個時候路跑就係最好嘅選擇,不過想話將跑步嘅時間偷到盡,所以想試下早十個巴士站落車跑返屋企。

好彩份工唔駛恤衫西褲,一落車就跑得。雖然揹住袋跑係唔多爽,不過一個鐘鬆啲就跑完都叫乾手淨腳。但係跑得幾次,揹背囊加埋自身增長咗唔少嘅重量,腳板底終於都開始投訴喇,加上見對舊ASICS KAYANO 已經磨到平哂,趁而家呢樣減果樣減,即刻入手ASICS GEL-NIMBUS 23,今年就靠哂你喇。

慘不忍睹的舊跑鞋 — ASICS KAYANO

點解會揀Nimbus?

首先咩都唔駛講,真係自細已經係Asics 嘅Fans, 由多年前第一次著佢開始已經返唔到轉頭,講緊係款式同功能都一絕。其他牌子跑鞋,自己著上腳總會覺得太硬或者太窄,有一次甚至著個零月就爆隻腳指尾出嚟。當然,呢個都係個人感覺啦,於是乎轉下轉下轉咗去A記懷抱。

嘗試過幾次揹住都唔少嘢嘅背囊通勤跑,就知道一對承托力十足嘅款式會係我嘅首選,做足功課,加上喺專門店嘅意見,選定就立即入手ASICS GEL-NIMBUS 23,著嚟行下街返幾日工,第一個感覺係好輕,原來全新GEL-NIMBUS 23鞋底採用FLYTEFOAM中底科技,更輕薄大底可以大大減輕鞋款重量。

新鞋第一跑前影張相先

好喇,踩到佢Fit哂我腳形就跑得喇!FLYTEFOAM中底科技除咗輕,緩震效果非常之好亦係佢主要功能,加上前後掌配置更多FLYTEFOAM,著住佢可以帶來更柔軟舒適的足部感受!我受過大傷嘅半月板會好直接咁反映比我知佢冇作大。話說有次著對三間平底悠閒鞋追車,咁就痛幾日。著住NIMBUS係跑完10K都冇呢個問題,呢一點係親身證實。後來睇返官方資料先知,原來新一代Nimbus 增加咗鞋底嘅GEL,不過就冇講實幾多%了。

FLYTEFOAM中底科技
著嚟行下街返幾日工先跑,個人認為係好習慣
泥地、石屎地、磚地、草地乜都行勻哂
未用腳,先用手感受GEL+FLYTEFOAM。好彈手。

鞋面—美觀以外的實際功能  

你睇我對舊KAYANO 同新呢對NIMBUS 基本上係同一隻色同一個Style 就知,小弟對跑鞋嘅款式要求就只係要見到A記Logo,不過原來外觀設計都影響性能。NIMBUS 23 唔只提供多種配色,仲採用更柔軟嘅網眼設計和鞋口內襯,配搭同樣更柔軟嘅鞋孔栽片及虎爪材質;務求以高包裹性的鞋面設計同埋更貼腳的兩側包裹結構,將舒適度和緩震效能提升至更高層次!

咁當然,著住跑得舒服只係第一步,一對好嘅跑鞋當然更加可以提升表現。NIMBUS鞋底用上創新嘅運動科技 – 三維立體中底支撐結構 (3D CLOUD CONSTRUCTION),主要係幫助跑手蹬踏發力,呢一項非常啱長距離訓練者,每當去到後段幫助就更加明顯,親試果然係好爽,小腿嘅疲勞及繃緊情況改善咗唔少。

三維立體中底支撐結構幫助跑手蹬踏發力

男女款設計有別‧尤如訂造

小弟著住嗰對梗係男裝啦,不過女跑手都唔會得個恨字,GEL-NIMBUS 23嘅另一進化就係針對不同性別嘅獨特設計,為男女跑手帶來尤如度身訂造一樣嘅精準支撐。男女鞋款除咗採用唔同嘅支撐系統,包括不同的TRUSSTIC中足穩定片及前掌大底彎曲凹槽設計,仲運用咗PLUS 3中底科技,將女裝鞋款腳跟位置增加3毫米高度,提供更穩定的支撐及保護!(男裝前後掌落差10毫米;女裝前後掌落差13毫米)

總結

GEL-NIMBUS 23 定價及定位都唔低,不過絕對唔係只係高手而設,相對嚟講同樣為新手跑手提供最大承托及支援。自身體驗後更加覺得非常啱膝頭大傷過嘅自己,衝擊由鞋底卸走得非常明顯,而且每一次蹬踏都有唔錯嘅回彈,保護及提升兩方面都做得好好。剛過去嘅秋冬已經跑殘咗對舊鞋?當然係換Nimbus 23嘅好時機啦!

發佈回覆

你的電郵地址並不會被公開。 必要欄位標記為 *